காவடி சில நினைவுகளும் பகிர்வுகளும்-12

காவடி சில நினைவுகளும் பகிர்வுகளும்-12

காவடிக்கு முன்பு நாம் செய்த குலதெய்வ வழிபாட்டை பற்றி பகிர்ந்து கொண்டு இருந்தோம்.குல தெய்வ வழிபாடு என்பது  நமது தமிழர் மரபின் தொன்று தொட்டு வரும் மரபு.நாம் போற்றும் குலதெய்வங்கள் ,பெருந்தெய்வங்களின் அம்சமாகவே இருக்கும்.ஒவ்வரு கோவிலிலும்,சிவாம்சமாக ,சக்தியின் அம்சமாக,பெருமாள் அம்சமாக ,மற்றும் நம் முன்னோரில் ஒரு பெண் தெய்வமாக கட்டாயம் குடியிருப்பார்.

                          கருப்பன் என்பதே பெருமாளின் அம்சமாக காக்கும் தெய்வமாக இருக்கும்,இவர் தம் சகோதரி அங்காலேஸ்வரி சக்தியின் அம்சம்,இருக்குமிடம் கட்டாயம் இருப்பார்.சோனை சாமி,அய்யனார்,முனீஸ்வரர்,பைரவர் ,வீரபத்ரர் இவர்கள் எல்லாம் சிவம்சமாக இருப்பார்கள்.பேச்சியம்மன் என்பது சரஸ்வதி அம்சமாக இருக்கும்,சப்தமாதர்கள் ஒரு பீடத்தில் இருப்பார்கள்.பிள்ளையார்,முருகப்பெருமானும் பரிவார தெய்வங்கள் வரிசையில் இருப்பார்கள்.நம் முன்னோர்கள் குலதெய்வம் என்பதை தமது இருப்பிடத்திற்கு அருகில்,அமைத்து பூஜித்து வந்திருப்பார்கள்.ஆனால் இன்று பொருள் தேடி பல காதம் வந்து விடுகிறோம்.ஆனாலும் வருடத்தில் ஓர் நாள்,அங்கே சென்று பொங்கல் வைத்து ,படைத்து வணங்கினாலும் போதும்.தாய் தன குழந்தைகளை காப்பது போல் காத்து தரும்.ஆகாம விதிப்படி அமைந்த கோவில்களுக்கு ஆறுகால பூஜை அவசியம், ஆனால் நம் குலதெய்வம் வருடத்தில் ஒருநாள் வந்தாலும் போதும் அதையே வருடம் முழுமையும் வந்த பயனை தந்து நம்மை காத்தருளும்.
எனவே குல தெய்வ வழிபாடு என்பது வருடம் ஒருமுறையும்,சுபகாரியங்கள் நடை பெரும் முன்பும் கட்டாயம் செய்யப்பட வேண்டியது.

                        காவடி எனும் மாபெரும் ஆன்மீக பயணத்திற்கு முன்பும் நாம் முதலில் நம் குலதெய்வத்தை வழிபட்டே தொடங்கினோம்.அதன் படி மே மாதம்  23 தேதி பயணம்,சக்குடியை முடித்து குருச்சியை நோக்கி புறப்பட்டது. அதன் நடுவில் ஓர் சுவாரஸ்யமாய் அன்று தான் 10 ஆம் வகுப்பு  பரீட்சை முடிவு.எங்களுடன் ஸ்ரீராமனும் பயணம் செய்ததால் பத்து மணி ஆகும் முன்னே பத்து தரம் வேனுக்குள்ளே நடை பயின்றான் ஸ்ரீராமன். வண்டி மானாமதுரை சென்றடைந்தது,குறுச்சி  செல்லும் திருப்பம் அங்கே சர்ச்சுக்கு அருகே நிறுத்தப்பட்டு சில பொருட்கள் வாங்கப்பட,மணியும் 10 ஐ தாண்ட பசலைகாரர்களின் வாழ்வில் அங்கம் வகித்த அந்த இடத்தில் வெளிப்பட்டது ஸ்ரீராமன் பரீட்சை முடிவு.அவனும் நல்ல மதிப்பெண் பெற்று தேர்ச்சி பெற்ற விவரம் அவனது அரவிந்த் டாடி மூலம் வெளிப்பட, மகிழ்ச்சியும்,நெகிழ்ச்சியும் ஆன பயணமாய்,அனைவரிடமும் ஆசியும்,வாழ்த்தும் பெற்று பயணம் தொடர்ந்தான் ஸ்ரீராமன்.

                    குறிச்சி  ,இது எங்கள் முத்தையன் கோச்சடை விட்டு எங்கள் முன்னோருடன் அவர்களுக்காகவே பிடி மண்ணாய் உடன் வந்து வேரூன்றிய இடம்.சிவகங்கை சீமை வானம் பார்த்த பூமியாய் இருப்பினும்,எங்கள் மாவடியான் திருவடியும்,அவனை சுற்றிய வயல்வெளியும் என்றும் பசுமையுடன் தான் இருக்கும்.நெல்,வாழை ,கரும்பு என ஏதாவது ஒரு பயிர் அவரை சுற்றி செழித்து வளைந்து கொண்டு தான் இருக்கும்.
மதுரையை அடையும்  முன்னே அதன் கோபுரங்கள் கட்டியம் கூறும் அம்மையப்பன் இருப்பை.அதேபோல் குறிச்சியை  நெருங்கும் முன்னே எங்கள் மாவடியான் கோபுரமாய் மருத  மரங்கள் நெடிந்துயந்து நிற்கும்.

              கிராமத்து சந்துகளை கடந்து  சிறு கால்வாயை தாண்டி,வயல் வரப்பில் இருக்கும் தென்னை மரங்களை சுற்றிக்கொண்டு ,பொங்கல் பானையுடன் நாங்கள் செல்லும் சுகமே சுகம்.வரப்பில் சென்று அறியாத நாங்களும் ஒரு புது அனுபவமுடனே எங்கள் ஐயனை காணும் பக்தி மிகுந்த ஆவலுடன் செல்வோம்.இரண்டு பெரும் மருத மரங்களும், ஓர்  ஆலமரமும், குடைபோல் கவிழ்ந்திருக்க அதன் இயற்க்கை நிழலில் நடு  நாயகமாய் பீடமாய் எங்கள் குலதெய்வம் மாவடிக்கருப்பன் ,முத்தையன்,மாட மாளிகை இல்லா மன்னவன் வீற்றிருப்பான்.அவருக்கு இடப்புறம் ஆணைமுகனும், அவன் தாய் அங்காலேஸ்வரியும் ,முருகப்பெருமானும் கொலு இருக்க.
அவர்களுக்கு நேரெதிர் இடப்புறமாய், வீரபத்திரர்,இருளப்பசாமி,பதினெட்டாம் படி கருப்பு,பேச்சியம்மன்,ஏழு கன்னிமார் என அருள் செய்கின்றனர். மாவடியானுக்கே எதிரே சோனை சாமியும் பலிபீடமும் இருக்கும். மாவடியானுக்கு நேரெதிர் வலது புறம் கருப்பாயி அம்மன்,ராக்காயி அம்மன்,மற்றும் இருளாயி அம்மன் சன்னத்திகள் அமைந்திருக்கும்.

             வழக்கமாக நாங்கள் செல்லும் நேரத்திற்கு பின்னே அங்கு சென்றடைய,அன்று எங்கள் குலதெய்வம் எங்களுக்கு அருள் பாலிக்க,ஆசி கூற பூஜை ஏற்றுகொள்ள தயார் என இருந்தார்.வசிஷ்டர் வாயால் பிரம்மரிஷி பட்டம் பெற்ற விஷ்வாமித்திரர் போல் எங்கள் குடும்பத்தினரிடம் சபாஷ் பெற்றார் எங்கள் பூசாரி.அவரும் அன்றொருநாள் மட்டும் தன உணவகத்தை மறந்து மாவடியான் பூசாரியாக முழுதாய் ஈடுபட்டு இருந்தார்.
அவரையே மாற்றிய அற்புதம் கந்தனை தவிர யாரை சாரும்?

            காலை உணவை மாவடியான் சன்னதியில் பசியாறி,பின்னர் மனமும் ஆறினோம். ஆம் அங்கே காவடிக்கான சிகப்பில் பச்சை இட்ட கச்சையை வைத்து வணங்கினோம். எங்கள்  குலதெய்வமதை மனமார வழிபட,அங்கே பெரியத்தான் மீதிறங்கி இந்த காவடி சிறக்க உடன் வந்து,தக்க துணை தந்து அனைவர் குறை தீர்ப்பேன் என சூளுரைத்தது மாவடிகருப்பு. அதன் பின்னே,முருகனுக்கு எடுக்கும் காவடிக்கு  அச்சாரமாய் முத்தையன் சன்னதியில் ஸ்ரீராமனுக்கு கச்சை கட்டி அவனை கைதூக்கி ஆடவைத்து முதல் அடி எடுக்க வைத்தார்கள் அவனுடைய மூர்த்தி தாத்தா.அது பார்த்திபனூர் கருப்பன்,மாவடிகருப்பனுக்கு கட்டிய கச்சை ஆனது.

           குளிர்ச்சி மிக்க குறிச்சி திட்டை விட்டு,மிகுந்த குளிர்ந்த  மனதுடன் பார்த்திபனூர் நோக்கி பயணப்பட்டோம்.

காவடி சில நினைவுகளும் பகிர்வுகளும்-11

காவடி சில நினைவுகளும் பகிர்வுகளும்-11

              சைவ சித்தாந்தம் வழி நின்று வினை மற்றும் அதன் பயன் ,அவை செயலாற்றும் விதம் குறித்த சிந்தனை சென்ற பகிர்வுகளில் பகிரப்பட்டது.மேலும் சில வற்றை உங்களுடன்.

                       நம் செய்த  வினையின் பயன் நம்மை கட்டாயம்வந்தடையும்.
பரந்தாமனே பக்க துணையாக இருந்த போதும் வனவாசமும்,அன்ஞாத 
வாசமும் பாண்டவர்க்கு தவிர்க்க முடியாததாக போனது.இதன் மூலம் புராணங்கள் உணர்த்துவது செய்த வினையின் பயன் அவரவரை கட்டாயம் வந்து சேரும் என்பதே.

                         பாண்டவர் தம் செய்கர்மா முடிந்த பின்னே அதே பரந்தாமன் தானே தூது சென்று சமாதானம் சாத்தியமாகாமல் அவர்களை
தர்மயுத்தம் செய்வித்து அவர்களை காத்து தர்மத்தை வெல்லசெய்தான்.

அதுவும் போர்க்களத்தில் துவண்டு நின்ற பார்த்தன்,உபதேசம் பெற்ற பின்னே "எல்லாமே நீயே கிருஷ்ணா"-  என அவன் பாதம் பணிந்து நின்ற பின்னே.

                   இந்த இதிகாசங்கள் நமக்கு உணர்த்துவது   யாது....சற்றே சிந்தித்தால் விளங்கும் நமக்கு உண்மை.நாம் செய்யும் செயல்கள் யாவிலும் உண்மையும்,நேர்மையும்,பிறர் மனம் நோகா தன்மையும்,நமது செய்கர்மங்களுக்கு நாமே பொறுப்பு எனும் அறிவும் இருந்தால் போதும்.
 அதற்கான பயன் நல்வினையாக நமை வந்து சாரும்.

        நல்லவற்றையே சிந்தித்து,நல்லவற்றையே பேசி,நற்செயல்களையே செய்தோம் ஆனால் நமை சுற்றி நல்லனவே நடக்கும்.ஒரு மனிதன் தன்னையே சார்ந்து அதிக நேரம் நல்ல எண்ணங்களை  [positive thought ] கொண்டிருக்க இயலாது ,ஏனெனில் நாம் மனித இனம்,சஞ்சலம் என்பது நமது உடன் பிறந்தது,எனவே மற்றொரு அதீத சக்தி மீது நாம் நம்பிக்கை  வைக்கின்றோம்.அதுவே நமது மொழியில் சிவம்,சக்தி ,முருகன் என இன்ன பிற தெய்வங்கள்.இந்த இறை நம்பிக்கை நம்மை பலப்படுத்தும் நமது நல்ல எண்ணங்களை செயலாக்கி தரும். அவ்வாறு தாம் செய்து தருவோம் என நமக்கு ஆறுதல் தர சில சமிக்கைகள் அவர்களிடம் இருந்து தேவைபடுகின்றன.அவற்றை நமக்கு தருவது நம் வழிபாடு.அதன் வழி சன்னதம் வந்து சொல்வதும்,நம் உள்ளத்தினின்று உணர்த்துவதும் ,நாம் செய்யும் செயல்களை தடையின்றி செலுத்தி தருவதும்,நம்தெய்வம்  நமக்கு தக்க துணை நிற்பேன் என சொல்லால் சொல்லாமல் நமக்கு உரைக்கும் செய்தி.

                            நமது தெய்வநம்பிக்கை நமக்கு கிடைத்த வரப்ரசாதம்.நமது குடும்பங்கள் ஒன்றிணைந்து வருடம் தோறும் பழனி பாதயாத்திரை எனும் ஆன்மீக பயணத்துடன் தொடங்குகிறது.இந்த பயணம் அந்த வருடம் முழுமைக்கும் நமக்கு உற்சாகம் தருகிறது.அதன் வழியில் இந்த காவடி எனும் மாபெரும் நிகழ்வு ,நமது வாழ்க்கை பயணத்திற்கு உற்சாகம் தருகிறது.ஒரு குடும்பமாய் A S PILLAI FAMILY என்ற ஆலமரத்தின் அடியில் இளைப்பாறும் நாம் ,என்றும் அவர்களது அருள் வட்டத்துள்
இருகின்றோம் என்பதை நமது பாட்டனும்,முன்னோரும்,
குலதெய்வங்களும்,பெருந்தெய்வங்களும் நமக்கு சில சமின்கைகள் மற்றும் அற்புதங்கள் மூலம் நமக்கு உணர்த்தின இக்காவடியில் அவை இதோ.

                        காவடி எடுத்து செலுத்தி இருமாதம் கடந்த பின்னே மெல்லவே அரங்கேறுகிறது அதன் சிறப்பினை பற்றிய தொகுப்பு. ஆனபோதும் அதன் உணர்வினில்,அதனை வெளிப்படுத்தும் விதத்தினில் அன்று  இருந்த அதே உணர்வு மீண்டும் சிலிர்த்து எழுகிறது.இதுதான் பேரின்பம் என்பதோ? காவடி அம்மைநகர் வீதி வலம்  வந்தது மேமாதம் 25 ஆம் தேதி.அதன் முன்னே குலதெய்வம் வழிபாடு செய்ய நாங்கள் புறப்பட்டது 

                  23 ஆம் தேதி.அம்மைநகர் இருந்து புறப்பட்ட வாகனம் நாகமலை வந்தது.அங்கு அன்பு தம்பி ப்ரசன்னா ஆயிரம் மையில்களுக்கு அப்பால் இருந்து கடல் கடந்து பறந்து வந்து கண்களில் பயணக்களைப்பு இருந்தபோதும்,அன்பு சொந்தங்களை,அவனை வளர்த்த பந்தங்களை காண ஆவல் கொண்டு,அடுத்த தலைமுறை வாரிசாக ஆன்மீக பயணத்தில் காவடி என்னும் அற்புத நிகழ்வில் பங்குபெற,தாய்நாடு வந்த சூட்டோடு தன் குலம் காக்கும்  கருப்பனை வழிபட  எங்களுடன் இணைந்து கொண்டது.எங்களை சுமந்து கொண்ட வாகனம் சிவகங்கை சீமை நோக்கி சென்றது.

                  முதல் பயணமாய் அபினவ் கார்த்தியை இவ்வுலகம் காண அருள் புரிந்த அவர்களின் குலதெய்வம் வீற்றிருக்கும் சக்குடி நோக்கி சென்றோம். சிவகங்கை சீமை வானம் பார்த்த பூமி,வறண்ட மணற்பரப்பும்,நிறைந்த சீமை கருவையும்,ஆங்காங்கே தண்ணீரும் அதனால் வளர்ந்த சில மரங்களுமாய் காட்சி தரும்.அன்று நாங்கள் சென்ற சக்குடியும் அதன் ஒரு பகுதிதான்.இங்கு கொலுவீற்றிருக்கும் நளினமான குணம் கொண்ட எங்கள் அத்தை வணங்கும் தெய்வமது மூன்று இடத்தில் அதே ஊரில் சில தூரம் இடைவெளியில் அமைந்திருந்தது.

                  முதலில் நாங்கள் அந்த கிராமத்தின் உள்ளே தெருக்களின் மத்தியில்  அமைந்திருந்த சாந்தாயி அம்மன் என்ற பெண் தெய்வம்.கருணை ததும்பும் வடிவுடன் கிராமத்து மணம்  மாறாமல் அமைந்த திருக்கோவில். அடுத்து சென்றது வயல் சூழ்ந்த இடத்தில் வரப்புகளின் நடுவே சிறு கட்டிடத்தில் குடி கொண்ட,தீப்பாய்ந்த அம்மன் என்ற பெயர் கொண்ட பாக்கியத்து அம்மன்.அந்த கோவில் முதலில் பீடமாய் இருந்து பின்னர் சிலை அமைத்து உள்ளனர்.வரும் தீமை யாதகினும் அதை  தன்  சுட்டு விழியால் மாய்த்து தன பக்தர்க்கு தக்க துணை செய்திடுவேன் என சூளுரைத்தது இந்த அம்மன்.அங்கிருந்து சற்று தொலைவில் பிலாவடி கருப்பு கோவில்.

                   பில்லத்தி  கருப்பு கோவில் ,இது எங்களுக்கு ஏற்படுத்தவிருந்த பிரமிப்பு அறியாமல் உட்புகுந்தோம்.இந்த அற்புத கோவில் அமைந்திருப்பது ஊருக்கு சற்றே வெளிப்புறத்தில் உயர்ந்த கண்மாய் கரையில்.கோவிலின் முகப்பு கண்மாயை நோக்கி இருக்க,பாதை நோக்கி இருப்பது பின்புற வாசல்.அதனை சுற்றிக்கொண்டு கண்மாய் கரையில் அமர்ந்து ஆட்சி புரியும் பில்லத்தி  கருப்பனை வழிபட கோவில் உட்புகுந்தோம். முதலில் வாசலுக்கு நேரே  இருக்கும் சன்னதி பில்லத்தி  கருப்பன்.ஆனால் அங்கே கருப்பன் நமக்கு நேரெதிர் கட்சி தராமல் இடப்புறம் சன்னதியில் வீற்றிருக்க அவரது தங்கையாம் ராக்காயி அம்மன்  அவருக்கு எதிர்புறம் நமக்கு வலப்புறம் அமர்ந்து அருள் புரிந்தார்.இங்கு உள்ள கருப்பன் அவ்வளவு சக்தி மிக்கவன் நேரெதிர் தரிசிக்க இயலா உக்கிரம் கொண்டவன்.அதனாலே இந்த சன்னதிகளின் அமைப்பு இவ்வாறு உள்ளது. இடப்புறமும்,வலப்புறமும் இவர்கள் வீற்றிருக்க,கோவில் வாசலின் நேரே இருப்பது சன்னதி வாசல்,அதன் நேரே மற்றொரு வாசல் உட்புறம் நோக்கி இருக்க,அதன் வழியாய் நமக்கு காட்சி தந்தவர் ஐயனும்,சாஸ்தாவும்.

                           பில்லத்தி  கருப்பன் சன்னதிக்கு புறம் சென்று வலம்  வந்தால் ஐயனை காணலாம், அங்கே அருமையான தேஜசுடன் ஐயனும் அவருடன் பூர்ணகலா தேவி,சந்திரகலா தேவிஅருள்பாலித்தனர்.அவர்களுடனே அங்கே சாஸ்தாவும் அமர்ந்து தன அருள் நோக்கை தருகின்றார்.

                              அங்கே பரிவார தெய்வங்களாக வீற்றிருந்தார் எங்கள் முத்தையா.அழகிய குதிரை மீது அழகனாய்  ஆக்ரோசமாய் எங்கள் முத்தையன்.நின்ற திருமேனியாய் கோச்சடையில் கண்டுள்ளோம்,
அருஉருவமாய் குறுச்சியில் கொண்டுள்ளோம் ஆனால் வெட்டருவாள் தாங்கி குதிரைமீது பாய்ந்துவரும் கோச்சடையானாய் மாவடி கருப்பனாய்  பில்லத்தி  கருப்பன் கோவிலில் கண்டு சிலிர்த்தோம்.

                      இன்னும் இக்கோவில் இருக்கும் பரிவார தெய்வங்கள் ஒவ்வரு கிராமத்திலும் உள்ள காக்கும் தெய்வங்கள் அனைத்தும் ஒன்றிணைந்து கூடியிருந்தார் போல் இருந்தது.
     
                    அங்கே இருந்த ஒரு மரம் மற்றுமொரு அதிசயம்.திருகுவாச்சி என்ற பெயர்கொண்ட இந்த கோவிலின் தலமரம்.அதில் மணியை கட்டி இருந்தனர் அதனை மூடி  மறைத்து மரம் வளர்கிறது.பிரார்த்தனை மணி உள்ளே செல்லும் போது  அவர்கள் பிரார்த்தனை நிறைவேறும் நம்பிக்கை. 
              
                  இப்படி அதிசம் அநேகம் நிறைந்த அத்தனை தெய்வங்களும் கூடி அருள் பாலிக்கும் பில்லத்தி கருப்பனை வழிபட்டு இந்த காவடி முருகன் திருவடி அடைய அருள் புரிய வேண்டி வணங்கி புறப்பட்டோம் குறிச்சியை  நோக்கி.

காவடி சில நினைவுகளும் பகிர்வுகளும்-10

காவடி சில நினைவுகளும் பகிர்வுகளும்-10

நம் முன்னோர்கள்,குலதெய்வங்களை வணங்கி அவர்கள் துணை கொண்டு முருகப்பெருமான் பாதங்களை பற்றுவோம்.

சென்ற இருபதிவிலும் சைவ சித்தாந்தம் வழி நின்று விணை    மற்றும் விணைப்பயனை பற்றி பார்த்தோம் மேலும் சில சிந்தனைகள் .

விணை  மூன்று வகையாய் நின்று  புரியும் என பார்த்தோம்.
1.ஆகாமியம்,2.சங்சிதம் மற்றும் 3. ப்ராப்தம்.

 இன்று இதில் மூன்றாம் வகை ப்ரப்தம் பற்றிய மேலும் சில விவரங்கள்.

ப்ராப்தம்-நாம் செய்த விணை யினை  அனுபவிக்கும் பகுதி.இதில் நல்லதும் கெட்டதும்  அடக்கம்.இந்த ப்ராப்தம் மூன்று வகையில் நம்மை வந்து அடையும்.அவை...

1.ஆதி ஆன்மிகம்,ஆதி பௌதீகம்,ஆதி தைவீகம்.

ஆதி ஆன்மிகம்-
நாம் செய்த விணை யின் பயன் பிற உயிர்கள் மூலம் நமை வந்து அடைவது. பிற உயிகள் என்பது ஓர் அறிவு முதல் ஆறு அறிவு பிராணியான மனிதன் வரை எத்தன மூலமாகவும் வந்து நம்மை அடையும் .இதிலும் துன்பம்,இன்பம் இரண்டும் உண்டு.

ஆதி பௌதீகம்
நாம் செய்த விணையின் பயன் ஜடப்பொருள் மூலம் வந்து அடையும்.ஜடப்பொருள் என்பது இந்த உலகினையும் ,அதில் உள்ள உயிரற்ற பொருட்களையும் சாரும்.
ஒரு ஜடப்பொருளை நாம் அடையும் போது மகிழ்ச்சியும்,அது கிடைக்காவிடின் அல்லது தொலைந்த பின் வரும் துன்பமும் இதில் அடங்கும்.

ஆதி தைவீகம் 
இது முற்றிலும் இறைவனால் நமக்கு அளிக்கப்படுவது.பிறப்பு,இறப்பு இந்த இரண்டும் இறைவனால் நமக்கு அளிக்கப்படும் விணைப்பயன் .
இறைவன் ஐந்தொழில் செய்வதாக சித்தாந்தம் விவரிக்கிறது.

படைத்தல்,காத்தல்,அழித்தல் ,மறைத்தல்,அருள் செய்தல்- இவையும் நம் விணையை பொறுத்தே அமையும்.

நியதி; அவரவர் வினை  அவரவர்க்கே வரும் என்பதும்.அவர் செய்த பாவ,புண்ணியப் படியே - நற்குடியில்,நற் சார்பில் அவரை பிறக்க செய்வித்து பலன் தரும் என்பதும் நியதி.

மேற்கண்ட நியதி படி நாம் நோக்கின்... இறைவன் நமை நற்குடியில் பிறப்பித்து,நற் சார்பில் வாழ்வித்து நமக்கு நல்  வழியும் கட்டுகிறார் என்பதில் ஐயம் இல்லை.
நாம் செய்த சில தீவிணையின் பயனாய் இன்னல்கள் வந்த போதும்,அவற்றை கடக்க நம் நல்விணை  பயனாய் நல்லதொரு குடுபத்தை அளித்துள்ளான்.இறை வழிபாடு என்னும் ஒப்பற்ற வரத்தை அருளியுள்ளான்.இருளில் தவிக்கையில் ஓர் கீற்று ஒளி தென்பட்டாலும் அதனை கூர்ந்து நோக்கி அதன் வழி சென்று வெளிச்சத்தை அடைவது மனித இயல்பு.அதே போல் நமக்கு கிடைத்த இந்த a s pillai குடும்பத்தையும்,
அதன் வழியே பக்தி மார்கத்தையும், சிக்கென பிடித்தால் சிக்கல்களை களையலாம்.

"தெய்வம் என்றால் அது தெய்வம்,வெறும் சிலை என்றால் அது சிலை தான்".
கவிஞரின் வாக்கு.

நம் நம்பிக்கை தான் வெற்றியை தரும்.நமக்கு நம்பிக்கை வைக்க,அது எல்லாவற்றையும் தீர்க்கும் என்ற உறுதியை தந்து நம்மை இட்டு செல்ல அந்த இறைநம்பிக்கையால் மட்டுமே இயலும்.எனக்கு மேல் இருக்கும் சக்தி என்னை வழிநடத்தும் என்ற உறுதியை இறைவன் மட்டுமே தர இயலும்.
என் இறைவனை நான் சிவமாய் பார்ப்பேன்,உங்கள்  இறைவனை சக்தியாய்,விநாயகனாய் ,முருகனாய் ,பெருமாளாய்,அவரவர் விருப்பபடி வணங்கலாம்.நம் கண் முன் இருக்கும் சிலை வடிவம் எவ்வுருவாய் இருப்பினும் நம் வழிபாட்டு தெய்வமாய் அதை வணங்கலாம்.

அதன்படி மே 4 ஆம் தேதி கட்டப்பட்ட மூத்த கங்கணம் ,எந்த விழாவாக ஆனாலும் முன் நின்று சாரதியாய் அதை வழி நடத்தி செல்லும் எங்கள் மாமாவிற்கு,வயது எழுபதை கடந்த பின்னும் இளமை கூட்டத்தில் தன்னை இணைத்து கொண்டு,அவர்களுக்கும் சவாலாய் முன்னே செல்லும் இந்த சிவனடியார்க்கு ,அவர் விருப்பபடி கட்டப்பட்ட கங்கணம். அவர்களின் மூத்த தலைமுறை என்ற முறைப்படி அவர்களின் சிறிய தந்தையார் கங்கணம் கட்ட முன்னே வந்து யார் கட்ட வேண்டும் உனக்கு என கேள்வி எழுப்ப,அந்த அங்காலேஸ்வரி வந்தாலும் சரி என் அன்னை வந்தாலும் சரி எனக் கூற,எங்கள் முத்துக்குமார் தாத்தாவின் வடிவில் அகிலமெல்லாம் ஈன்றடுத்த அன்னை பராசக்தி வந்து வாழ்த்தி கட்டியது கங்கணம்.

அன்றைய நிலையில் 11 கங்கணங்கள் அம்மை நகரில் முருகன் இல்லத்தில் கட்டப்பட, 
அதே பொழுதில் இன்னும் மூவருக்கு கட்டப்பட்டது கங்கணம் அன்பே சிவம் என்று பெயர் தாங்கி நிற்கும்  அன்னை இல்லத்தில்.சிவனும்,சக்தியும் இணைந்து உலகை செலுத்துவது போல், இவர்களின் அன்பான ஆசியினால் வளர்கிறது சொந்தங்கள்.நம் மூத்த தலைமுறை பொக்கிசங்கள் கருப்பையா தாத்தாவும்,கோமதி அப்பத்தாவும்.

நம் குடும்பத்தின் மூத்த தலைமுறை தம்பதிகள் அம்சமுடன்,அன்புடன் அம்மை அப்பன் வடிவாய் நின்று இந்த காவடி இச்சமயம் எடுப்பிக்க மூலமாய் கரு விதைத்து,அதை கொண்டு செலுத்த துணையும் புரிந்து,முழுதாய் தங்களை ஈடுபடுத்தினர் காவடியில்.

பாட்டனை தாங்கி,கருப்பனையும்  தாங்கி ,நிற்கும் சிவக்குமார் சித்தப்பாவின் வடிவில் தான் நமக்கு முருகா தாத்தா நமக்கு பரிச்சயம்.அவர்களை நேரில் காணாத பெயரன் பேத்திகளுக்கு,முருகா தாத்தா என்ற ஒரு சக்தியை மனதில் பதிய வைத்த பெருமை சிவகுமார் சித்தப்பாவையே சேரும்.அவர்களுக்கு கட்டப்பட்டது கங்கணம் அவர்களின் குடும்ப ஆணி வேறாய் திகழும் அவர்களின் அன்னையின் கரத்தினால்.

அடுத்து பஞ்ச பாண்டவராய் ,அம்மை நகர் வாரிசுகள் காவடி எடுக்க, அதற்கென இந்த நகுல,சகாதேவனாய் பாலாஜியும்,செந்திலும் கங்கணம் கட்டி கொண்டனர்.

மொத்தம் கட்டப்பட்ட கங்கணம் எண்ணிக்கை 14 என்று இருந்தது....ஆனாலும் அனைவருக்கும் மனதில் வருடியது ஒற்றை இலக்கத்தில் ஈன் இல்லை என்று.கங்கணம் கட்டும் போதே மூர்த்தி சித்தப்பா ,அரவிந்த் அத்தானிடம் ,அபினவ் கை காட்டினால் நீயும் எடுக்கிறாய் காவடி என சொல்ல அத்தானிடம் மௌனம்.சில நேரம் நம் மனதின் உள்ளுணர்வு நமக்கு கட்டளை இட்டால் தான் செய்வோம்.அதன் படி முருகன் அவர்களுக்கும் உணர்த்திட்டான்,அத்தானும் உணர்ந்து கட்டி கொண்டனர் கங்கணத்தை இரண்டு நாள் சென்று.

காவடி நினைத்து பார்த்து மனம் நிறைவடையும் ஒரு ஆன்மீக பயணமானது.மீண்டும் பயணிப்போம்...

காவடி சில நினைவுகளும் பகிர்வுகளும்-9

காவடி சில நினைவுகளும் பகிர்வுகளும்-9

               ஒவ்வொரு பதிவும் எழுத ஆரம்பிக்கும் பொழுதும் எனக்கு தோன்றும். குறி சொல்லும் குறத்திகள் தங்கள் தெய்வமாகிய முருகப் பெருமானையும், தாய் ஜெக்கம்மாவைவும் துணை கொண்டு வணங்கி தன் வாக்கில் அவர்கள் வந்து குடியேறி நல்ல சொல்லை சொல்லி அருள் புரிய வேண்டுவார்கள்.அது போல நானும் எழுதும் எழுத்துக்கள் சரியானதாக அமைய என் அம்மையப்பனை மனதில் நினைத்தே சொல்லில் வடிக்கின்றேன்.

             சென்ற பதிவில் விணை  மற்றும் வினை பயனை பற்றி சில வற்றை பகிர்ந்தேன்,
மேலும் சில விவரங்கள் சைவ சித்தாந்தத்தில் இருந்து.
நாம் செய்யும் செயல்கள்,மனதில் நினைப்பது,சொல்லாய் உதிர்ப்பது இவையே விணையாக ,கர்மாவாக மாறுகிறது.இதனை மூன்று நிலைகளில் வகைப்படுத்துகிறது  சித்தாந்தம்.
1.ஆகாமியம்,2.சஞ்சிதம்,3.ப்ராப்தம்.

ஆகாமியம் ;
இது நாம் அன்றாடம் செய்யும் விணை -நல்விணை ,தீவிணை  இரண்டுமே.இதன் அடிப்படையில் தான் நம் விதி அமைகிறது.

சஞ்சிதம்;
நாம் செய்த விணையானது ,செய்து முடித்த உடன்...தொல்வினையாக மாறி சூட்சமமாய் சஞ்சரித்து கொண்டே இருக்கும்.இந்த சஞ்சாரம் காலம் எதுவரை என்றால் அதனை நாம் அனுபவிக்கும் வரை.இது நொடி பொழுதில் தொடங்கி .....ஜென்மங்கள் வரையும் தொடரும்.

ப்ராப்தம்;
இது சூட்சமமான சஞ்சித விணை  பயனாய் வருவது. இங்கு தான் நமது நல்விணை -புண்ணியமாய் மாறி இன்பத்தையும், தீய வினை பாவமாய் மாறி துன்பத்தையும் தருகிறது.

              துன்பம் தரும் தீவினையின் பயனை குறைக்க வழி வேண்டுமே ?அது தான் வழிபாடு. நம்முடைய இஷ்ட தெய்வத்தை மனதார நினைத்து ,நம்பிக்கையுடன் வழிபாடு செய்வதே பக்தி.

           சிறுபிள்ளையாக கைகூப்ப தெரிந்து ,சொற்கள் மழலையாக வரும் போது கைகூப்பி கடவுள் முன் நிற்கும் குழந்தைக்கு, நம் பெரியவர்கள் "எனக்கு நல்ல புத்தியை கொடு ,நல்ல படிப்பை கொடு " என்று தான் சொல்லி சொல்லித்தருகிறார்கள்.இதே வேண்டுதலை எப்போதும் தொடர்ந்தால் இன்னல்கள் ஏன் வருகிறது.

                        கூட்டு பிரார்த்தனைக்கு வலிமை அதிகம், நமக்காக வேண்டாமல் அடுத்தவர் நலனுக்கு வேண்டும் போது அதன் வலிமை இன்னும் அதிகரிக்கும்.ஒரு பொழுது செய்யும் பிரார்த்தனைக்கே இவ்வளவு வலிமை எனில்....கங்கணம் எனும் மங்கள நாண் கட்டி இருபத்துஒரு நாட்கள் சிந்தை முழுதும் மங்களம் நிரப்பி,அனைவர் குடிகளும் சிறக்க,
குறைகள் களைய கந்தனிடம் வேண்டிய அந்த பிரார்த்தனை எத்தனை சிறப்புற்றது.

           இந்த காவடி திருவிழா சிறப்பாக நடந்தேறும் என்று அன்றே சூளுரைக்கப்பட்டது. ஆறுபேருக்கு கங்கணம் கட்டிய பின் அடுத்தது...எங்கள் குல தெய்வமதை  சுமந்து நின்றாடும் பெரியத்தானுக்கு.அன்று கட்டப்பட்ட அந்த கங்கணம் எங்கள் பெரிய மாமாவின் மகனுக்கு அல்லமாவடியானுக்கு.என்றும் வழி நடத்தும்  மருதமரத்து அரசன் அன்று உடன் வந்து காவடியை முருகன் சேவடியில் சமர்பிக்க உற்ற துணை இருப்பதற்கு சத்திய வாக்கு தந்தான்.

          அம்மை நகரில்,நம் குடும்பம் காணும் நான்காவது காவடி திருவிழா இது.சிலவற்றை சிலர் தான் வழிநடத்த விதித்திருப்பான் வேலவன்.அது போல் காவடியை கட்டுமிடம் என்றெ  என்றும் முருகன் இல்லம் தான்.தலைமுறைகள் கடந்தாலும் அதன் வாரிசுகள் வசம் தான் ஒப்புவித்தான் அந்த புண்ணிய பொறுப்பை.தீர்க்க தர்சி நம் பாட்டன் ,அதில் ஐயம் இல்லை,அதனால் தான் தம் வம்சத்தில் இருவருக்கு குல தெய்வம் பெயரிட்டார்கள்
.காவடி பொறுப்பையும்  கருப்பையாக்களின் தலைமையில் அமைத்தார்கள்.

உருவானது காவடி-மூத்த கருப்பு வெளியிட்டகாவடி எடுப்பித்தல் என்ற  விருப்ப படி.

செயலானது காவடி-இளைய கருப்பு அதில் காட்டிய ஸ்ரத்தையினால்.
அம்மைநகரில்  அவர்களை மீண்டும் அமர்த்தி ஆன்மிகம் நம்வீட்டில் தழைக்க வைத்தது முருகன் அருள்.

                இந்த இளைய கருப்பையா விற்கு கட்டப்பட்டது கங்கணம்.ஒருவர்க்கு கட்டினால் அது நால்வர்க்கு கட்டியதாய்  ஆகுமோ?ஆகும். சித்தப்பா கட்டி கொண்டது இரண்டு கங்கணங்கள். 

                     தனக்கு ஒன்று,பிரசன்னாவிற்கு ஒன்று என. ஆனால் கட்டும் போது -
கட்டியது இராமநாதபிள்ளை [முத்துகுமார் தாத்தா வடிவில்]கட்டப்பட்டது-சுப்பையா  பிள்ளைக்கு.
            
            பிரசன்னாவிற்கு கட்டியது ஒன்று-அது தம்பிக்கு மட்டுமா இல்லை அவன் வடிவில் நின்ற பார்த்திபனூர் கருப்பனுக்கு.தம் பிள்ளைகளை எல்லாம் வழி நடத்தி காவடியை நல்முறையில் செலுத்த வேண்டிகொண்டனர் எங்கள் அத்தைமார்.

                       அன்றே சத்தியம் செய்தார்கள் நம் பாட்டன் பிரச்சனைகள் ஒவ்வன்றாய் சரி செய்யப்படும் என்று- அதன் படி கங்கணம் கட்டிய 12 ஆம் நாள் நல்ல முடிவை எட்டியது ஒரு பிரச்சனை.

திக்கற்றவர்க்கு தெய்வமே துணை ! அந்த துணை என்றும் கைவிடாது!

மீண்டும் அடுத்த பதிவில்.

காவடி சில நினைவுகளும் பகிர்வுகளும்-8

காவடி சில நினைவுகளும் பகிர்வுகளும்-8

                  காவடியை பற்றிய நினைவுகளை எழுதுவதற்கே கூட நேரம் கூடி வர வேண்டியுள்ளது.ஒருமித்த சிந்தையுடன்,எந்த தடைகளும் இன்றி இதனை எழுதவே இத்தனை காலம் பிடிக்கின்றது.நடந்தவற்றை எழுதுவதற்கே இப்படி என்றால்,நடந்த செயல் தடையின்றி நடந்ததற்கு இறைவன் அருள் எவ்வளவு இருக்க வேண்டும்.

                  இறைவன் மிகவும் கருணை வடிவானவன்,நமக்கு உதவுவதே அவரின் தலையாய கடமை.அப்படி இருக்கையில் ஏன் இவ்வளவு பிரச்சனைகள்? நான் என்ன தவறு செய்தேன்? எனக்கு மட்டும் ஏன் இவ்வளவு சோதனை? இந்த எண்ணங்கள் நம் யாவருக்கும் தோன்றும்.

                  அதற்கும் சைவ சித்தாந்தம் பதில் கூறுகிறது. உயிர்களாகிய நம்மை உய்விக்க ,முக்தியை தரவே இறைவன் எப்போதும் முயல்கிறான்.நாம் செய்த விணை....நல்விணை,தீவிணை இரண்டும் நம்மை வந்து சேரும்.இந்த விணை பயன் எப்போது வந்து சேரும்....காலம் பார்த்து நம்மை வந்தடையும். மனதால்,செயலால்,சொல்லால் எவ்விதம் நாம் செய்திருந்தாலும்,அவ்விதமே நம்மை வந்து அடையும்.

                  நல்விணை பயன்கள் நமை வந்து அடையும் போது மிகவும் மகிழ்வோம்,தீவிணை பயன் நமை வந்து அடையும் போது துவண்டு விடுவோம். நாம் அனுபவிக்கும் அத்தனைக்கும் அந்த,அந்த  தனி உயிர் மட்டுமே காரணம்.முதலில் இதனை மனதார ஒத்துக்கொள்ளும் மனம் வேண்டும் நம்மிடம்.அப்போதுதான் அதன் பிரயச்சித்தம் செய்ய இயலும்.

                நான் செய்த விணை தான் என்னை வந்து அடையும் எனும் போது,இறைவனையோ, இன்னொருவரையோ குற்றம் சொல்வது எப்படி பொருந்தும்?.இதனை பற்றிய சிந்தனை நமக்கு வேண்டும்.

               அப்போது கடவுளிடம் என்ன வேண்டுவது? எதற்காக வேண்டுவது? எப்படியும் நடப்பது நடந்தேறும் எனும் போது எதற்கு இந்த பக்தி?என்ற கேள்விகள் எழும் நம்முன்னே!
              தவறு செய்பவர்க்கு தண்டனை,தண்டனை காலத்தில் நல்ல நடத்தை என்றால் தண்டனை காலம் குறைப்பு. என மனிதனே சட்டம் வகுத்திருக்கும் போது ,அவனையே ஆட்டுவித்து சகலமும் ஆனவனுக்கு தெரியாதா நமை என்ன செய்வது என்று?
               அதை உணர்த்தவே நம் முன்னோர் நமக்கு காட்டும் பாதை இது.                      
நான் செய்த விணைக்கான பயனை நான் மனதார ஒப்புகொள்கிறேன், அதன் பயனையும் ஏற்றுகொள்கிறேன் ,ஆனால் அதற்கான மன தைரியம் ,வலிமை அத்தனை காலம் காத்திருக்கும்  பொறுமை,நம்பிக்கை இவற்றை எல்லாம் எமக்கு அளித்து எமை வழிநடத்து என்பதுவே!
   
பிறவிப் பெருங்கடல் நீந்துவர் நீந்தார் இறைவனடி சேராதார்.
              
            நாம் நல்லவற்றை நினைக்க,நல்லவற்றை செய்ய,நல்லவற்றை பேச நமக்கும் எல்லாம் நால்லதாய் அமையும்.இவை அனைத்தும் இந்த காவடி மூலம் நிறைவேறியது.எல்லாருடைய குறைகளும் தீர ஒருமித்து செய்த பக்தி திருவிழா இது.
              
           இதில் ஒவ்வருவரும் தன் நிலை ,பதவி மறந்து சரிசமமாய் இறைவனுக்கு அடிமை பூண்டது, அம்மைநகரில் கல்வி மேலும் சிறக்க பொருளுதவி செய்தது, நம் குடும்பம் அனைத்து ஒற்றுமையாய் அணிதிரண்டது, அன்று ஒரு பெண்ணின் திருமணம் நிகழ சிறு கருவியாய் நாம் இருந்தது,பக்தியின் பயனை நாம் மட்டும் அனுபவித்து மகிழாமல் அம்மைநகர் முழுமைக்கும் பக்தி எனும் மங்கலத்தை பங்கிட்டது என பட்டியல் நீண்டு கொண்டே போகிறது.
             இவை அனைத்தும் நம் நல்விணை பட்டியலில் சேரும் போது இறைவன் நம் கணக்கை தவறாமல் சரி செய்வார்.
           
             களப்பிரர் காலம் என்பது நம் தமிழக வரலாற்றில் உண்டு அதனை,மாற்றி தழைக்க செய்தது நாயன்மார்களின் பக்தி.அதே போல் நம் இல்லங்களில் உள்ள இருளை களைந்து ஒளிமயமான வாழ்வு தரும் காவடி.வெப்பம் தாளாமல் ,பயிர் பச்சை முதல் மனிதன் வரை வாடி வறண்டு தவிக்கையில் தவறாமல் வருணனை அனுப்பி குறை தீர்த்திடுவார்  அப்பன்.அதே போல் நமை காக்க வந்தது  கந்தன் காவடி .

             சென்ற பதிவில் ஐவரின்  காப்பு கட்டியதை பார்த்தோம் ,அதன் வழியில் அடுத்து வருவது அம்மைநகர் முருகன் இல்லம் கண்ட அடுத்த தலைமுறை மூத்த வாரிசு பாசமிகு அண்ணன் மருது  பாண்டியனுக்கு.
            
பழனியாத்திரை, பாதயாத்திரையாக தொடங்கும் போது அண்ணன் தம்பிகளில் தனி ஒருவராய் இந்த அத்தான்களிடம் அகப்பட்டு ,அத்தனைக்கும் ஈடுகொடுத்து,பழனியில் மண்டபம் அமர்த்துவதில் தொடங்கி சாப்பாட்டு ஏற்பாடுவரை சளைக்காமல் செய்யும் இந்த தர்மருக்கு,இந்த முறை பாண்டவர் ஐவராய் காவடி எடுப்பதில் மகிழ்ச்சி.
                  இந்த வருட பிறந்தநாள் எங்கள் அண்ணனுக்கு சிறந்த நாளாய் அமைந்தது காப்பு கட்டப்பட்டு தொடங்கியதால்.இத்தனை வருடம் எத்தனை சோதனை வந்த போதும்,சுப்பன் குடும்பம் கொண்ட நம்பிக்கை மாறாமல் ஆறுமுக அப்பனை எப்போதும் நம்பும் மூத்த வாரிசுக்கு,வாரிசு தருவேன் என்று கீழ சேவல் பட்டியில் வாக்கு தந்த சக்திமைந்தன் அதை சாத்தியமாக்க தந்த கங்கணம் அது.
 மீண்டும் அடுத்த பதிவில்.